‘Miðenni’ nýbygningur nr. 63
Í góðveðrinum í gjár varð móttøka hildin á bryggjuni í Fuglafirði, nú Bakkafrost fekk handað metstóra tvíkilju frá KJ. Pinnamatur, prát og gott lag setti sín dám á hátíðarløtuna. Bert ein tvíkilja í hesari støddini er veitt áður frá KJ, og hon varð handað Hiddenfjord í fjør summar. Nýggja tvíkiljan hjá Bakkafrosti hevur fingið navnið Miðenni og fær heimstað í Kollafirði.
Tvíkiljan Miðenni er nýbygningur nummar 63 hjá KJ, og hon er 20 metrar long og níggju metrar breið. Hetta ger at hon hevur stórt og gott dekspláss.
Ein máttmikil 119 KVA generator veitir ravmagnsorku til allar tær elektrisku útgerðina umborð. Komandi ár verður DB útgerð eisini sett umborð á Miðenni, ið ger at tvíkiljan kann liggja still á einari knattstøðu meðan arbeitt verður. Hetta er kærkomin útgerð at hava, tá arbeitt verður á harðbalnu føroysku firðunum á hávetri.
Av nautiskari útgerð, sum Radiobúðin hevur leverað, kunnu millum annað nevnast:
- GARMIN GPSMAP 8416xsv plottari og ekkolodd
- GARMIN GPSMAP 8416 plottari
- GARMIN GMR 18 HD+ radari
- GARMIN GT21-TH botnur
- GARMIN VHF 115i
- FURUNO SCX-20 satellittkumpas
- SIMRAD A2004 sjálvstýrari
- AUTONAUTISK KUMPASS 100
- SAILOR SP3520 berbarur GMDSS VHF
- FUSION MS-RA60 radio
- FURUNO BR-560 rørslufølari
